User:JPeton/nasin

mi kama wile sona e ni: nasin seme la mi ken sona e nasin pona pi toki pona? nanpa wan la jan li ken toki e ni tawa mi: nasin pona wan li lon ala. nasin pona mute li lon. ni la o kama sona e nasin ale. taso kin la nasin pakala li lon: jan sin li toki e "mi tawa e tomo" la sina pilin nasa lili. sina wile ante e toki ona tan pakala ken. ni la mi kama alasa e sona ni: nasin seme la ni li ken pakala?

toki pona li toki lon. kulupu li kepeken ona. mi ken sitelen tawa sina kepeken toki pona. sina ken lukin e sitelen mi la sina ken sona e toki mi. mi jo e pilin lon insa mi la mi wile pana e ona tawa sina. mi kepeken toki tawa pana ni la sina ken jo e pilin sama lon insa sina. mi wile sona e toki pona la mi o lukin e ni: nasin seme la jan li kepeken ona?

taso namako ni li lon: toki pona li toki pali. tenpo pini poka la jan ala li toki pona. jan Sonja li mama e ona lon insa ona li pana e ona tawa kulupu. ante lili li kama lon tenpo, taso ona li suli ala. suli la toki pona li awen toki sama. mi wile sona e nasin toki pona la mi ken lukin e nasin toki pi jan Sonja.

tenpo open pi toki pona la jan Sonja li awen ante lili e toki pona. nimi pi mute ala li kama li weka. nasin li ante lili. taso kin la kulupu li ante e toki pona. jan Sonja li wile sona e ijo sama ni tan kulupu: nimi jalan anu nimi noka li pona nanpa wan tawa ona? kulupu li wile ala wile e nasin sin? taso jan Sonja li toki ala e ante wan tawa kulupu li pali e ona: nimi anu li weka tan toki pona. tenpo ni (2002-12-10) la jan Pije en jan Lamen li toki e ni:

jan Sonja li weka e nimi "anu". ni li nasa mute! jan Sonja li toki ala e ni: "jan ali pi toki pona li wile e seme?" jan Sonja li kute e toki pi wile ona taso. (tan: http://forums.tokipona.org/viewtopic.php?f=33&t=96)

jan Elena li wile e ni: kulupu pi toki pona li kepeken nimi anu. kulupu li suli li wawa la toki pona li toki lon. jan li ken ala ante e ona tan wile ona taso. jan Iwona li pilin ante: jan Sonja li mama e toki la ona li ken ante e ona. ante li ike tawa sina la o kepeken nasin ante, taso o ike ala tawa jan Sonja. taso jan olin pi jan Iwona li pilin ante: jan Sonja li pana e toki tawa kulupu la ona o kute e kulupu sama ni: ona li pali e tomo tawa, taso jan ante li kama lon insa ona lon poka pi jan Sonja. jan Sonja li wile ante e nasin pi tomo tawa la ona o toki e wile ona tawa kulupu o kute e wile kulupu. ni la toki pona li kama toki kulupu: nimi anu li awen lon toki pona. kulupu li wile e ijo la mama toki li ken ala ante.

tan seme la mi toki e tenpo pini suli ni? mi awen sona ala e tan pi toki pona pona. taso jan Sonja taso li ken ala tan ni (tan li ijo lon toki ni). wile kulupu li suli la toki li ante. taso kulupu kin li ken ala ante e toki lon wile ona: jan wan li wile weka e ijo, jan ante li wile pana e ijo sin, jan ante ante li wile ante e ale. taso ona ale li ken ala: toki pona li awen sama. jan wan li ken ala toki e ni tawa jan ante: toki pona sina li ike anu pakala. ona li nasin ante taso.

taso kin la, pakala li ken lon: jan sin li kama sona e toki li sona ala e ona ale la ona li pakala. mi awen kama sona e toki: ona li toki mama mi ala. mi kepeken ona lon tenpo lili taso. mi kin li jan sin, taso mi jan pi sin lili. mi sona e nimi ale, mi ken toki, mi ken musi kepeken toki. taso mi kin li ken pakala la mi awen alasa e nasin pona.

ken la jan Sonja li awen ken pana e nasin pona: lipu pu li ni ala ni? mi wile ala toki suli lon lipu pu (mi ni lon tenpo ante lon lipu ante), taso suli la o sona e ni: nasin pi lipu pu li nasin wan taso. ona li kama ante tan kepeken kulupu. nimi sin li lon pu (pan, esun), nimi ante li weka (leko, kipisi), nimi ante ante li kama wan (kin, a; sin, namako). ijo lili ante kin li lon la jan Sonja li toki e ona lon open pi lipu ku. lipu pu li suli tawa toki pona, taso toki pu pi suli nanpa wan li ni: "lipu pu li toki e sona wile pi toki pona. sina lukin e ona sina ken kama sona e toki pona. toki pu li ken pana e nasin e nimi. ale ante li kama tan sina." (mi Peton li toki pona e toki Inli Sonja, p. 62.)

ijo tu suli li toki. nanpa wan li ni: lipu pu li pana e "sona wile" pi toki pona (toki Inli: basic guidance; toki Kanse: règles de base). ona li pana ala e sona ale. ona li pana e sona open taso. sina sona e lipu pu la sina ken sona e lipu ante. taso lipu pu li pini ala e toki pona. ona li open e ona. ijo suli nanpa tu li ni: "ale ante li kama tan sina" (toki Inli: "Now the rest depends on you"; toki Kanse: "Dorénavant la suite vous appartient"). kepeken toki ni la jan Sonja li pana e toki pona tawa kulupu. pu la pali ona li pini. toki Sonja la "pu la mi wile pana e selo pini pi toki pona" (lipu pu, p. 7).

pu li open e toki pona, taso ona li pini ala e ona. toki pona li awen ante li awen kama sin. kulupu li kepeken ona la kulupu li kama sona e ijo sin. musi en nimi en nasin sin li kama li weka. suli la, toki pona li awen lon. pilin mi la toki pona li sama ma. jan Sonja li lukin e ma li pana e sona ona tawa jan. taso toki li ken ala tan jan wan taso. jan li toki tawa jan ante. toki li kama tan kulupu toki. jan mute li kama lon ma la ona li alasa e nasin ante ona. mi tawa kekepen nasin mi, sina tawa kepeken nasin sina. mi en sina li ken kama lon poka. mi lukin e nasin sina. sina lukin e nasin mi. mi tu li ken kama sona e ijo sin tan nasin poka.

pini li seme? nasin pona li seme? mi awen kama sona e ona. mi lukin e pakala pi jan sin la mi pilin e ni: ona li lukin pona ala e ma. ken la ona li pana e noka ona lon lupa anu jaki, taso ona li sona ala. mi sona pona e ma la mi ken lukin e ni li ken toki e ni tawa jan sin: o lukin e lupa – nasin ante li ken tawa toki wile sina. ona li kute li lukin e toki pona mute la ona li kama sona e ma. taso ma li awen suli. mute pi insa ona li awen len tawa mi ale. taso mi seme lon ma ni? jan Sonja li toki e ni: "o pilin pona. o pali, o musi, o pona!" ni li nasin pona pi toki pona.